fbpx

3 حاجات لازم تعرفيهم لو بتدرسى انجليزى للأطفال

[spacer height=”20px”]

هاى 🤓

المرة اللى فاتت وقفنا عند ليه تبقي مُدَرِسة. كونك دلوقتي بتقرى الكلام ده في حد ذاته حاجة كويسة 👏💪

يلا بينا

يعني ايه مُدَرِسة؟ طب امتي دورى ينتهى؟ طب ايه الفرق بين تعليم الأطفال و الكبار؟ ايه الأسئلة الكتير دى!! 🏃‍♀️

خلاص خلاص، خلينا نشوف الإجابات..برااااحة! 💅

١- طريقة التعامل مع الكُبار فى الـ class

تعليم الكبار هو اشبه بإعطاء أدوات و شرح طريقة استخدامها لكن بقية المسئولية بتبقى علي الفرد في المذاكرة، السؤال عند الحاجة، المتابعة و التدريب…الخ. 🤓 دورنا بيكون مركز اكثر على تبسيط الأمور و توصيل المعلومة و ميضرش برضه اننا ناخد شخصية و نفسية الطالب في الاعتبار 😃

بعد الصبر و تأدية دورِك علي اكمل وجه، النتيجة ١٠٠٪؜ في ايد الطالب لان ابسط حاجة، هو اللى ختار يبقي هنا بنفسه.. 🙄

بس في حاجة نخللى بالنا منها! طريقة تهذيب و توجيه الكُبار مختلفة، يعنى جادة بس من غير ما يحسوا بالإهانة او انهم زي الأطفال، لان كتير منهم بيبقى بالفعل حساس ناحية انه كبير و لسة بيتعلم، لازم نوصلهم كويس اوى ان عادى و ده مش غلط، مجتمعنا هو اللى مفهمنا انها حاجة عيب، للأسف. 

٢- طريقة التعامل مع الأطفال فى الـ class

اما بقي الطفل مختارش! فى اللى من حُسن حظه حَب الموضوع، و فيه اللى اهله معتبرينه مشروع العمر و هاتَك يا دروس و تدريبات طول الأسبوع!! و في حاجات كتييييير بتأثر علي الطفل داخل الفصل.

نفسية و عاطفة الأطفال بتكون ٩٠٪؜ و ١٠٪؜ بس أكاديمى.. ايوه! عشان كده يُعتبر تدريس الأطفال من اصعب الحاجات اللى ممكن نعملها! مش مجرد منهج و خلاص، لأ absolutely، ده صبر و احتواء و تربية و بناء شخصية و حاجات اكبر بكتير اوى من مجرد شرح درس. عشان كده أي حد بيشوف كتب الأطفال و يفتكر انها شغلانة سهلة و يتريق و كده عشان منهج سهل، هو حكم علي اللغة بس و كده كده لو انا بدَرِس لغة فَأى منهج المفروض يبقي سهل بالنسبالى.. وللا ايه يا وحش 🙄

٣- نفسية الطفل اهم حاجة!

ليه؟ 🧐

الطفل لو اتطمن و حس بقبول و حنية، هيبقى اسعد و اشطر طفل! 

اسعد قبل اشطر، ها..؟ 😊

الطفل كائن حساس صغير لسة صفحة بيضة، ادق و اصغر التفاصيل بتأثر فيه و في ردود فعله اكتر من ما نتخيل. تصرفات كتير للأطفال بتبان عادية او ملهاش تفسير و لكنها فالحقيقة بتعكس طبقة كاملة من نفسيته و أفكاره و مشاعره. و مش لازم يكون حاجة في وقتها، ممكن يبقي دافع (trigger) قديم مانعرفوش و ده اللى أحيانًا بيصعب الموقف شوية لانه في الأغلب هو كمان مش فاهم. 

عشان كده اهم حاجة  في تدريس الأطفال هى التعرف علي شخصيتهم و اننا نديهم فرصة يعبروا عن نفسهم من غير ما نجبرهم علي قالب معين. نعرف نقاط قوتهم و ضعفهم، بيحبوا ايه و بيكرهوا ايه، بيخافوا من ايه و حتى تفاصيل صغيرة زي بيحبوا ياكلوا ايه و ايه اكتر لون بيحبوه!

من هنا بتبدأ الخطة النميسة لكيفية اكتساب حب الطفل و بناء شخصية سوية ثم قوية و هما مش واخدين بالهم. 😈

دورنا مع الطفل بينتهي لما بيروح لمدرسة تانية، لكن طول ما هو معانا، الدور مستمر! 💪

فكروا في الموضوع انه كائن صغير ضعيف محتاجكوا و انكوا ليكوا دور كبير اوي في مستقبل الطفل ده. اكبر من ما تتخيلوا!

هنا ينتهي موضوع النهارده، لو بدأتوا تقتنعوا بس لسه مش عارفين تعملوا ايه و تبدأوا منين، استنوا الـ post الجاى هيبقى عن ما قبل و بعد و خلاااال الـ interview و تفاصيله 😉 

نعدى من عُنُق الزجاجة بعدها نتعمق في ادق تفاصيل ما يحدث داخل الـ class! 

اتمني تاني أكون ساعدتكوا، لو عندِك أى أسئلة ممكن تسيبيها في تعليق وده اكيد هيكون جزء من البوستات الجاية! 

باى. 🏃‍♀️

4 thoughts on “3 حاجات لازم تعرفيهم لو بتدرسى انجليزى للأطفال”

  1. الموضوع جميل جداً جداً
    بقترح لو يتحول لإنفوجرافيك أعتقد وقتها هيكون عليه تفاعل أكبر
    شكراً
    إستمروا ❤️

  2. معلومات مفيده وظريفه
    عايزين نعرف اكتر عن كل الجوانب اللي المفروض المدرسه تشتغل عليها لنمو طفل متكامل

Leave a Comment