fbpx

ازاى تعدى من الانترفيو وتعملى ديمو تبقى فخورة بيه 

هاى 🤓

اخر مرة قلنا مُلَخَّص عام شويتين عن الفرق ما بين تدريس الكبار و تدريس الأطفال و شوية عن نفسية الطفل، فاكرين؟ 🙄 اتمني تبقوا فاكرين 🔪😂

المهم، قبل ما أوجع دماغكوا بتفاصيل اكتر من كده، خلينا نشوف ايه الحاجات المهمة اللى لازم ناخدها فى الاعتبار قبل قرار التدريس، و نعمل ايه او مطلوب مننا ايه في الـ interview و الـ demo الشهير! 😱

يللا، ورقة و قلم معايا 😂

١- حاجات ناخدها في اعتبارنا قبل ما نشتغل في التدريس:

كلمة تدريس اكبر من ما معظمنا فاكر، في تحضير و مذاكرة و تصحيح و مراقبة و متابعة و حد مستواه أضعف من زمايله و حد مغرور و و و…😱

شخصيات و مواقف كتييير ممكن تصنع تحديات في السيطرة علي الـ class، بالذات مع السن الكبير لان بيبدأ يبقى في احراج لو الطريقة مكانتش كويسة، ذكاء اجتماعي كتير الفترة الجاية 😂

ده غير عالم الأطفال بقي 😆 ده جعان و ده عطشان و دي مامتها وحشتها و دول بيحبوا بعض.. اه والله 😂 و مش دايمًا الأهل بيساعدوا فا لازم نبقي strong و independent في نفسنا كده 🦸‍♀️🦸‍♂️

اللغة! لغتي لازم تبقى قوية بالشكل الكافى حسب هدرس لمستوى ايه لان اكيد مينفعش حد مثلًا يسألني سؤال معرفش إجابته، و المهم جدًا و الناس معتبراه حاجة كده على الجنب هو النطق، الـ accent يعني! لان بكل بساطة فاقد الشيء لايعطيه 🙄 لو انا بغلط في الـ th وللا الـ p و الـ b أو vowel sounds مثلًا، هعلمهم لحد تاني ازاي؟  و لو انا حافظة مش فاهمة هفهمهم ازاى؟ 

طب ايه هدف الكلام ده؟ نتعقد؟ لا!

هدفه ان قبل ما ناخد القرار ونبعت الـ CV نبقي عارفين و واعيين بحجم الموضوع مش اكتر، نفتكر مسئولياته و مميزاته برضه، فاكرينها؟ ☺️ وانه مش مجرد انى بدخل حصة اقول كلام و امشي، لازم مرونة و بساطة وذكاء اجتماعي (تاني)، لازم نبقى مُنفَتِحينْ لِطُرُق و أفكار جديدة لأن كل يوم هنعلم ناس و طلابنا هيعلمونا كتيييير اوي سواء كبار او صغيرين، لازم نكون جاهزين عشان محدش يفتكر ان المشكلة عنده، التعليم مسئوليتنا فا مينفعش حد يطلع من عندي حاسس انه غبي مثلًا او ان مفيش أمل لمجرد اني ماكنتش جاهزة! و طبعًا اني أتأكد اني جاهزة نفسيًا و علميًا لده، يعني مذاكرة كويس و فاهمة بقول ايه و بتكلم ازاى 😉

٢- اعمل ايه عشان اعدى الـ interview بهدوء و ثقة؟ 

خدنا القرار و بعتنا الـ CV؟ نعمل ايه بقي دلوقتي؟ 👀

اول حاجة نهدي خالص لان الموضوع فعلًا بسيط 😇 تاني حاجة، نعرف كويس اوي اننا بني آدمين عادي و ان الشخص اللى بيعمل الـ interview بني ادم برضه عادي، مش بيعُض والله 😂 الهدوء و الثقة اكتر حاجتين بيخلوا الشخص يخرج أحسن ما عنده، و لو حصل أي غلطة، عااااادي! التصالح مع النفس يجي هنا بقي! 

حتى لو معنديش خبرة، لو انا فعلًا بحب التدريس و مهتمة بالنتيجة فرصي هتبقي اعلى بكتير من ما انتوا متخيلين و من ما اعداء النجاح بيصوروا 😃

يعني ٤ حاجات، الثقة، الهدوء، التصالح مع النفس و الacceeeeent 🏃‍♀️

٣- ازاي احضر demo كويس يبين قدراتى فى الـ class؟

طبعًا بعد كل interview لطيف، في demo الطف.

ايه هو الـ demo؟

الـ demo هى كلمة مختصرة من كلمة demonstration و معناها الحرفي شرح او إظهار، المعني الأبسط هو عَيِّنة تدريسية بتتطلب من أي حد عنده القابلية و بتكون ٢٠ دقيقة بالكتير، بيكون شبه تمثيل عشان الـ interviewer يكون عنده فكرة عن شكل و طريقة الـ interviewee جوة الـ class. 🤓

هو في الحقيقة مش ادّق شكل لأي حد في الـ class بس بيدي فكرة و نتيجة الـ interview بتعتمد بشكل كبير جدًا علي الـ demo و بالتالي لازم نحضرله كويس. ازاي؟

أولًا:

ثقة و هدوء و تصالح و accent 😂

ثانيًا:

نحضر المطلوب كمحتوى بس نظبط احنا الطريقة! بلاش ملل، جزء يكون جد و معلومات و جزء يكون تطبيق علي الدرس في شكل لعبة مثلًا، أي حاجة تبين الجانب المُسَّلي التفاعلي غير الجانب النظري.

ثالثًا:

بيساعد جدًا اننا نكون على طبيعتنا، يعني نضحك و نهزر، قولوا صباح الخير و سلموا على الناس الله يستركوا 😂

رابعًا:

ابتسموا 😊 ساعات من التوتر الواحد وشه بيقلب و مبيبقاش واخد باله و ده بيدي انطباع سلبي، relaaax!

خامسًا:

ماتقلقوش، الـ demo مش بيبقي زي الـ class. الـ class مُسَّلي جدًا و فيه تفاعل و ضحك و هزار و الـ interviewer نفسه بيكون عارف ان الوضع جوه الـ class غير الـ demo خالص و بالتالي لو حصل أي توتر او غلط، عادي. ☺️

سادسًا و أخيرًا:

ثقة و هدوء و تصالح و accent 😂🏃‍♀️

——-

و بكده يكون كلام النهاردة خلص، اتمني ده يكون ساعد حد محتار يشتغل في التدريس وللا لا انه ياخد القرار الصح ليه، و لو حد واخد القرار بس خايف يكون اتشجع 🤲🏻

ماتنسوش ان القرارين صح! بس اهم حاجة نعمل الحاجة اللى بنحبها بجد عشان نعرف نطلع احسن حاجة عندنا 😉

لو عندكوا أي أسئلة ممكن تسيبوها في تعليق و اكيد هيبقوا جزء من البوستات الجاية 😍

باي. 🏃‍♀️

Leave a Comment