fbpx

ازاى تزود ثقتك بنفسك وانت بتتكلم انجليزى

ازاى تزود ثقتك فى نفسك وانت بتتكلم انجليزى

[spacer height=”20px”]

كام مرة اتحطيت فى موقف انك تتكلم انجليزى قدام الناس بس كنت خايف او مكسوف تتكلم؟

كام مرة مرضتش تروح الانترفيو أول ما عرفت انه هيكون بالانجليزى؟ طب كام مرة روحت وبسبب خوفك معرفتش تتكلم خالص واترفضت؟

طب كام مرة معرفتش تعمل الـ Presentation المطوبة منك فى الشغل عشان كان فيها كلام كتير بالانجليزى وانت كنت خايف فخليت صاحبك هو اللى يعملها، وهو

اللى اترقى وانت لسه فى مكانك؟

مبدأيا كدا خلينى اقولك انك مش لوحدك، كلنا بنبقى خايفين نعمل حاجة احنا مش كويسين فيها او مش متعودين عليها، خصوصا لو هنتكلم انجليزى قدام الناس، مع انك لو

لسه بتتعلم المانى مثلا هتحس انك مش مكسوف تتكلم قدام حد عشان ده المانى يعنى 😀 هتحس انك جامد جدا عشان بتعرف تقول سطرين على بعض، ما دى مش لغتك الأم

طب اشمعنا بنتكسف أوى كدا مع الانجليزى بالذات؟ وازاى نتغلب على المشكلة دى؟

1) افصل ما بين مستواك فى الانجليزى وما بين تقديرك واحترامك لذاتك

احنا فى مصر للأسف بنربط الانجليزى بالمستوى الاجتماعى، بالمستوى التعليمى والوظيفى، وبالتالى بنحس اننا لو مش بنتكلم انجليزى بشكل كويس، فده معناه اننا اقل

من الناس اللى حوالينا على المستوى الشخصى، عشان كدا بقينا نربط مستوانا فى الانجليزى باحترام وتقدير الناس لينا واللى على اساسه بيتحدد مدى احترامنا وتقديرنا

لنفسنا، عشان كدا كل مرة بنيجى نتكلم فيها انجليزى، جوا دماغنا بنخاطر بمدى الاحترام والتقدير اللى بناخده من الناس اللى حوالينا، ودى حاجة بتكون على المستوى

النفسى وبتحصل فى الأغلب بشكل لا واعى، لأننا كبشر، مُهم جدا بالنسبة لنا مستوى الحب والتقدير اللى بناخده من الاهل والاصحاب وزملاءنا فى العمل، ده احتياج

بشرى من الدرجة الاولى، عشان احنا كائنات اجتماعية.


فالموضوع مش مجرد اننا بنتكلم لغة تانية وخلاص، الموضوع ليها أبعاد نفسية كبيرة جدا خصوصا فى بلدنا الحبيبة مصر، عشان بقينا نشوف الشخص اللى بيتكلم

انجليزى كويس و ابن ناس وبنحترمه جدا وبنقدره، انما الشخص اللى مش بيتكلم كويس فهو درجة تانية او مش cool قدامنا، دى للاسف الحقيقة اللى عايشنها،

عشان كدا أول حاجة لازم تعملها هى انك تفصل ما بين مستواك فى الانجليزى وما بين تقديرك واحترامك لذاتك، كونك بتغلط وانت بتتكلم انجليزى ملوش علاقة اطلاقا

بقيمتك كشخص، دى مُجرد لغة، انت مش مستواك فى الانجليزى، انت اكبر من كدا بكتير

2) اغلط كتير وتقبل كل غلطاتك

لما بنيجى نعمل حاجة أول مرة بيبقى من المتوقع والبديهى هو اننا نغلط كتير وان مستوانا يبقى ضعيف، كل خبير كان مبتدىء يوما ما

The expert in anything was once a beginner

لما نفهم ونُدرك الفكرة دى حاجات كتير هتتغير، مش هنبقى خايفين من اننا نغلط بالعكس، هنرحب جدا بغلطاتنا، لأننا عارفين ان احنا عمرنا ما هنتعلم ولا هنتطور من

غير ما نغلط

توماس اديسون حاول 1000 مرة لحد ما قدر يخترع اللمبة، محدش بينجح او بيوصل لهدفه من غير ما يغلط ويفشل، يبقى انت لما تغلط او حتى تفشل، ده مش معناه

غير حاجة واحدة بس، وهى انك بتحاول، ولو فضلت تحاول، يبقى هتوصل فى النهاية

غلطتك الوحيدة اللى ممكن تعملها هى انك تبطل تحاول

“Take chances, make mistakes. That’s how you grow.”
– Mary Tyler Moore

 

انا هتكلم فى النقطة دى من واقع تجربتى الشخصية، أنا قدمت على شغل فى English call center بس اترفضت 3 مرات فى الـ phone interview، وبعدها

عديت وروحت انترفيو فى مقر الشركة بس اترفضت، واشتغلت على نفسى وقدمت بعدها بشهرين واتقبلت، لما حاولت ابقى Presenter فى Enactus، طلبوا منى

انى اعمل Presentation بالانجليزى فى الانترفيو، بؤى نشف حرفيا 😀 يعنى معرفتش احرك شفايفى وانا بتكلم من كتر التوتر، بعدها فى أول مرة اعمل

 Presentation بالانجليزى قدام الـ Team بتاعى، رجلى كانت بتترعش بشكل واضح ومعرفتش اتحكم فيها خالص، بس مع الوقت الموضوع بقى أسهل، لحد ما بقيت من أحسن الـ Presenters فى الـ Team

اول مرة اقدم على شغل كـ English Teacher حرفيا معرفتش اتنفس واتوترت جدا قبل الانترفيو لدرجة انى كنت همشى، بس

لقيت انى معنديش حاجة اخسرها فدخلت عملت الـ Demo (يعنى اشرح اى حاجة) واتقبلت فى الانترفيو، وفى أول شهر الـ Feedback بتاعى كان 90% وتانى شهر طلعت الاول على الفرع وجبت Feedback 100% وكل ده بدأ بأنى كنت خايف ادخل الانترفيو،

حتى لما بدأت هنا فى Scientific Accent مستوايا كان مُختلف تماما عن دلوقتى

ده مثلا من أول الفيديوهات اللى عملتها

وده فيديو عملته بعدها بحوالى سنتين ونص

نقدر تشوف انى مستوايا اتطور بشكل كبير جدا، مع انى ساعتها فى 2016 كنت من أحسن الناس اللى بتتكلم وبتدرس انجليزى، بس عشان دايما بحاول اخرج من الـ

Comfort zone بتاعتى فده بيخلينى اتطور بشكل سريع، وجه اللى بيخلينى اعمل كل فيديوهاتى بالانجليزى عشان بخاف اتحرج قدام الناس، فده بيخلينى اتدرب

بشكل كويس وفى نفس الوقت بيجيلى Negative comments ساعات بيبقى ملهاش لازمة وساعات فعلا بتنبهنى لنقط ضعف عندى، وده بيساعدنى انى اتطور،

مكانش سهل عليا خالص انى اتقبل الانتقادات السلبية، ومش هكدب عليكم، احيانا كان بيأثر على ثقتى فى نفسي، خصوصا انى بعلم الناس Pronunciation،

فمينفعش اغلط، بس ده مش صح، فى النهاية، الانجليزى مش لغتى الام، فطبيعى ان اغلط، ده غير انى لو معملتش كدا عمرى ما كنت هوصل للمستوى اللى انا فيه

دلوقتى، وده احد الاسباب ان 99% من محتوى الفيديوهات اللى المصريين بيعملوه عن تعليم الانجليزى بيكون بالعربى، لأن محدش بيحب يشوف غلطاته او انه يطلع

على المسرح قدام العالم كله عشان يتفرج عليه وينتقده، ولو انت فاكر انهم بيعملوا كدا عشان الناس تفهم، فأحب اقولك ان اغلب الكورسات الكويسة بيكون الشرح جوا الـ

Class بالانجليزى ومن اول Level كمان وممنوع المُدرس يتكلم بالعربى، بس فى فرق كبير ما بين انك تتكلم فى مكان مقفول قدام عدد محدود من الطلبة ومابين ما

تتكلم اونلاين قدام الناس كلها واللى فى منهم كتير ناس أحسن منك

انا بقول ليه الكلام ده؟

عشان تفهم انك عمرك ما هتتطور من غير ما تغلط، ده مستحيل، تفبل غلطاتك واطلع على المسرح وتقبل الانتقادات اللى هتجيلك، انا عارف ان ده صعب جدا، محدش

بيحب يغلط قدام الناس، بس الانتقادات دى هتنبهك على نقط ضعفك وهتخليك تتطور فى وقت قليل، حتى لو الانتقادات جاتلك بشكل قاسى، اعرف ان ده نقص منهم مش

منك، لأن اللى بيفهم وعنده أقل قدر من الحكمة هيكون فاهم ان كلنا بنغلط وان كلنا فى يوما ما كنا مبتدئين

عشان خاطرى اغلط كتير، بس اتعلم من غلطاتك

3) اتدرب على انك تبقى Fluent

جزء كبير فى انك تبقى واثق فى نفسك هو انك تتكلم كويس، لو طريقة كلامك واضحة ومفهمومة وصوتك عالى وانت بتتكلم، ثقتك فى نفسك هتزيد

وطبعا ده موضوع مُهم جدا ويطول شرحه، عشان كدا اتكلمنا عنه فى مقال مُنفصل، تقدر تقراه من هنا

بس فى حاجة سحرية لو عملتها هتساعدك جدا وهى:

4) القراءة

خدها قاعدة كدا، لو انت مش بتعرف تقرا كويس بصوت عالى يبقى مش هتعرف تتكلم كويس، ودايما هتحس انك بتقطع كدا وانت بتتكلم، دول شوية نصايح هيساعدوك تبدأ:

  1. ابدأ بـ Paragraph صُغير وسجل لنفسك على التليفون وانت بتقراه
  2. طبق عليه قواعد النطق الأساسية، تقدر تعرفها وتتعلمها من الـ Free online course بتاعنا
  3. اقرا قدام المراية لحد ما تحفظ الكلام كله زى اسمك
  4. وانت واقف قدام المراية ابدأ ركز فى طريقة كلامك، نبرة صوتك، الاماكن اللى بتقف فيها، وحاول تتكلم بشكل طبيعى على اد ما تقدر، كل ما هتتدرب اكتر، كل ما الموضوع هيبقى اسهل عليك
  5. سجل لنفسك بعد ما تتدرب بشكل كويس عشان تقارن نفسك بأول تسجيل عملته، وتشوف اتحسنت اد ايه

لو عملت كدا ثقتك بنفسك وانت بتتكلم انجليزى هتزيد بشكل ملحوظ

5) قلد الممثلين، مذيعين الأخبار أو أى Public speaker (طبعا لازم يكونوا Native speakers)

الناس دى بتتكلم قدام ملايين من الناس، وعشان يقدروا يعملوا ده، اتدربوا لساعات كتير جدا عشان يبقوا واثقين فى نفسهم بالشكل ده، مع انهم native speakers،

عشان كدا لو قلدتهم فى كل حاجة بيعملوها مستواك وثقتك فى نفسك هتزيد، عشان تعمل ده، هتلاقى نفسك محتاج تتفرج على الفيديو على الاقل 5 مرات مثلا عشان

الموضوع يبقى اسهل عليك

دول 4 حاجات تركز فيهم وانت بتتفرج على اى فيديو:

  1. بيقغدوا او بيقفوا ازاى، الـ Body language بتاعتهم عاملة ازاى
  2. نبرة صوتهم وهما بيتكلموا
  3. طريقة نطقهم للكلام مع بعضه
  4. سرعتهم فى الكلام اد ايه

اتفرج على الفيديو وقلده لحد ما تحس انك مستريح وانت بتقوله والموضوع مش صعب عليك، وده طبعا هياخد وقت ومجهود كبير

6) افهم الـ Body language بتاعتك

فى أبحاث كتير بتوضح تأثير الـ Body language على الثقة بالنفس، وازاى بتأثر على ازاى الناس بتشوفنا وازاى احنا كمان بنشوف نفسنا، فى الـ Ted talk ده، Amy Cuddy بتشرح حاجة اسمها الـ Power posing وازاى ده بيساعدنا نزود ثقتنا فى نفسنا واحنا بنتكلم

اتفرج على الفيديو وحاول تبدأ تستخدم النصايح اللى فيه

7) اتبسط بالتجربة Have Fun

اهم حاجة وانت بتعمل ده كله هى انك تتبسط، متركزش على الهدف اللى انت عايز توصله، ركز على الرحلة نفسها، اتبسط بالتفاصيل والصعوبات اللى بتقابلها كل يوم، فى أبحاث كتير اثبتت ان لو انت مبسوط وانت بتعمل اى حاجة، هتحقق نتايج احسن بشكل كبير، وهتوصل لمستوى انت مكنتش تتخيله، من اشهر الابحاث دى هى اللى عملها Shawn Achor واللى لخصها فى الكتاب بتاعه
The happiness advantage

ده غير ان بعد كل هدف هيبقى عندك هدف تانى، فلو خليت سعادتك وانبساطك متوقف على وصولك لهدفك فانت هتبقى تعيس أغلب حياتك، اتبسط و خليك فخور بكل

خطوة بتاخدها ناحية هدفك، ارجع لأول نصيحة ابتدينا بيها فى المقال عشان تقدر تحقق ده

وخلى بالك ان التوتر هيزود غلطاتك، حاول تـ Relax على اد ما تقدر

فى النهاية

اعرف انك مش لوحدك، كلنا بنعانى من المشكلة دى، بس مع الوقت والمجهود تقدر توصل للمستوى اللى بتحلم بيه، مش محتاج غير انك تتعب و اوعى تبطل محاولة…

لو استفدت من المقال اعمله شير مع صحابك عشان يستفيدوا 🙂

3 thoughts on “ازاى تزود ثقتك بنفسك وانت بتتكلم انجليزى”

Leave a Comment