fbpx

ازاى تبقى Fluent

ازاى تبقى Fluent

النهارده قبل ما ابدأ السيشن، واحدة من الطلبة عندى، ماريا، سألتنى سؤال من أكتر الأسئلة اللى بقابلها مع طلبة كتير جدا، وهو ازاى اتكلم من غير ما أقف، من غير ما

اخد وقت كبير فى التفكير

الموضوع ممكن يبان صعب من برا، ودا طبيعى عشان احنا مش متعودين عليه، بس هو فعلا بسيط

خلينا نتفق اننا منقدرش نفكر فى طريقة نطقنا وفى تكوين الجُمل واحنا بنتكلم، لأن ده معناه اننا هنقف ومش هنعرف نبقى Fluent، افتكر نفسك وانت بتتكلم عربى كدا،

هل انت بتفكر وانت بتتكلم؟

طبعا لأ، انت بتتكلم وتركيزك كله فى الرسالة اللى انت عايز توصلها

عشان كدا احنا محتاجين نخلى الموضوع عادة (habit)

دى شوية حاجات هتساعدك فى انك تبقى Fluent ومتاخدش وقت فى انك ترد وتتكلم او تقف

1) فكر بالانجليزى

عارف الصوت اللى جوا دماغك ده؟ حوله انجليزى، يعنى مثلا بدل ما تقول جوا دماغك انا اول ما اروح البيت هاكل واقعد قدام التلفزيون، قول Once I get home,

I will eat and watch TV

لو اتعودت تعمل كدا، هتلاقى نفسك بتتمرن طول اليوم، وكمان هتلاقى نفسك عايز تقول حاجة بالانجليزى بس مش عارف تقولها ازاى، ايه الكلمة اللى ممكن استخدمها

هنا، طب الجرامر بتاعى كدا صح؟ وهكذا

هتاخد Notes للحاجات دى، وأول ما تروح البيت هتبدأ تعمل Search عشان تعرف، كدا انت استفدت حاجتين

اول حاجة هى انك عرفت تعبر عن نفسك فى الحتة دى، وكمان الكلمة أو قاعدة الجرامر اللى اتعلمتها مش هتنساها، عشان انت اللى دورت عليها و ذاكرتها واستخدمتها

خدت  بالك من حاجة؟

كل ده عامل زى ما تكون بتتكلم مع حد، لو فضلت تعمل ده كل يوم الموضوع هيبقى عادة عندك، والـ Fluency بتاعتك هتزيد بنسبة كبيرة مع الوقت، وقدرتك على

التعبير عن نفسك فى اى Conversation هتزيد

طبعا أول سؤال هييجى فى دماغك هو ازاى اتأكد ان اللى انا بقوله ده صح؟

اول حاجة ممكن تتأكد منها هى Google، كل حاجة متاحة اونلاين، وكدا كدا أكيد هيبقى عندك غلطات، وده طبيعى، بس مع الوقت الغلطات ده هتقل

من الحاجات اللى هتساعدك هى Grammarly

ده موقع تقدر تكتب عليه جُمل و Paragraphs كاملة وهو هيطلعلك كل الغلطات بتاعتك ويصححهالك، الغلطات الغير مقبولة تماما والأساسية بيطلعها، بس لو حاجة

advanced اكتر بيقى لازم تدفع فلوس وتشترك، بس انت مش هتحتاج فى الاول أكتر من الحاجات الأساسية فمش هتدفع اى حاجة

أهم حاجة انك لما تلاقى عندك اى غلطة متاخدش الحل وخلاص و تمشى، لأ، اعمل Search عن القاعدة وافهمها عشان ما تكررش نفس الغلطة قدام

2) اكتب مذكراتك بالانجليزى كل يوم

لازم يبقى عندك journal، ممكن تبقى على موبايلك، اللابتوب بتاعك، او حتى Notebook عادية

الفكرة هنا انك فى نهاية كل يوم بتكتب عن يومك، ايه اللى حصل معاك، ايه الحاجات الكويسة اللى حصلت، الحاجات اللى ضايقتك، كل حاجة حصلت فى اليوم اكتب عنها،

الموضوع مفيد جدا على المستوى الشخصى لأنه بيساعدك تفهم نفسك أكتر، وبيخليك تفضى دماغك، وبيساعدك تحل مشاكلك و بيقلل التوتر بشكل عام، لو عملت ده

كمان بالانجليزى، فهتلاقى نفسك بتتمرن بشكل يومى وببتكلم عن كل جوانب حياتك وطبعا هتراعى كل النقط اللى اتكملنا عليها فوق زى Grammarly وكدا

كل ده هيحسن الـ Fluency بتاعتك بشكل عام فى اى Conversation

بس افتكر ان اهم حاجة هى الاستمرارية

3) خطط لحياتك بالانجليزى

اكتب كل أهدافك فى الحياة بالانجليزى، الخطط بتاعتك على المدى البعيد والمدى القريب، لو مش بتعمل ده بالعربى حتى، ابدأ اعمله بس بالانجليزى، لأن ده هيفرق

معاك بشكل كبير جدا، لو معندكش خطة و أهداف واضحة فى حياتك، كل يوم هتمشى فى اتجاه شكل، فى مقولة بتقول

“A goal without a plan is just a wish.”

الخطة هى بداية النجاح فى اى حاجة فى حياتك، اكتب بالتفصيل انت عايز توصل لايه وكل يوم اقرا وعدل الكلام ده لحد ما توصل وتحقق أهدافك

4) لما تاخد اى Note اكتبها بالانجليزى

الفكرة بسيطة مش محتاجة شرح 😅 ده دايما هيخلى دماغك شغالة بالانجليزى وبخليك كل شوية تقابل حاجات انت مش عارفها وتروح تدور وتحاول تقولها

بالانجليزى، مع الوقت هتلاقى نفسك دايما بتفكر بالانجليزى ومش بتاخد وقت عشان تتكلم، مش بتفكر بالعربى وبعدها تترجم ده لانجليزى، لأ انت اصلا الكلام حاضر

جوا دماغك بالانجليزى

5) دايما استخدم قاموس English / English

اتعود انك لما تبقى عايز تعرف معنى اى كلمة، اعرف شرحها بالانجليزى، يعنى تشوف الـ Definition بتاعها وبعد كدا الأمثلة بتاعتها بالانجليزى، عشان لما هتعمل

كدا هتفهمها أكتر، ولما تشوفها محطوطة فى Example هتعرف تستخدمها صح، وهتعرف تفكر فيها و تفهمها بالانجليزى، وده اللى احنا عايزينه، احنا مش عايزين

نفكر بالعربي، عمرك ما هتعرف تبقى Fluent طول ما انت بتفكر بالعربى

ده غير انك لما هتعمل كدا هتعرف كلمات جديدة أكتر مربوطة بكل كلمة، هتلاقى حصيلة الكلمات بتاعتك بتزيد مع الوقت

من أفضل الـ Dictionaries اللى ممكن تستخدمها هى

  1. Cambridge dictionary 
  2. Merriam Webster dictionary   

6) اعمل Presentations كتير

من أحسن الحاجات اللى هتساعدك انك تطبق اللى اتعلمته فى الانجليزى هى الـ Presentations

بس مش اى presentation، الهدف النهائى اللى محتاجين نوصله هو اننا نكون بنتكلم انجليزى من غير ما نفكر وفى نفس الوقت من غير ما نغلط، عشان كدا انت

هتعمل script للـ Presentation بتاعتك .

يعنى ايه؟

يعنى هتجيب ورقة وقلم وتكتب كل الكلام اللى عايز تقوله وبكده هيبقى  معاك وقت تفكر فى الحاجات اللى هتقولها، وترتب افكارك، وتركز على الكلمات اللى

هتستخدمها، قواعد الـ Grammar وهكذا

وبعد ما تخلص كتابة الـScript هتبدأ تطبق كل قواعد النطق اللى تعرفها، هتكتبها على الورقة الاول عشان تاخد بالك منها

ومتقولش ان انا عارف القواعد فى دماغى، لأن مش معنى انك عارف القاعدة انك هتطبقها 😉

(it’s not about knowing the rules, it’s about applying the rules when you are talking)  

بعد ما تخلص كل ده هتبدأ تحاول انك تحفظ الـScript كويس، وتقف قدام المراية وتحاول تعمل presentation قدام المراية

-طبعا انت هتقول انا مش عايز ابقى حافظ، لان لما هكون بتكلم مع حد مش هبقى حافظ الكلام!وكدا

=انت عندك حق بس احنا لسه بنتعلم المشى وانت عايز تجرى 😀

الفكرة كلها انك بعد ما تعمل 20 او 30 Presentation بالشكل ده، هتبدأ تاخد بالك من الـ S بتاعة الـ Present simple زى he plays،

هتبدأ تعرف تستخدم الكلمات اللى انت حفظتها عشان استخدمتها قبل كدا فى Presentations كتير، هتبدأ تاخد بالك من الـP والـ b عشان فى كل presentation

كنت بتركز عليهم  وهكذا

وكمان هتلاقى قدرتك فى الكلام عن اى حاجة بقت اسهل، هتلاقى نفسك بتتكلم ما بين الـ Presenations بتاعتك، وهتلاقى ثقتك فى نفسك زادت بشكل كبير جدا

ازاى تقيس مستوى التقدم بتاعك؟

 

بعد كل presentation هتسجل لنفسك فيديو وتشوف طبقت القواعد اللى انت علمت عليها فى  الـ Script ولا لأ يعنى قولت he play ولا he plays وهكذا

طبعا مش هتعرف تمسك كل غلطاتك فى الاول، بس مع الوقت هتلاقى نفسك بتاخد بالك من غلطات أكتر، الموضوع هيبقى صعب شوية فى البداية بس مع الوقت هيبقى

أسهل ودايما خليك فاكر لما تاخد كل يوم خطوة صغيرة أحسن ما تفضل واقف مكانك

One is better than zero     

انا عارف ان الموضوع ده صعب وهياخد وقت كبير، بس اوعدك ان دى من أكتر الحاجات اللى هتساعدك تبقى Fluent فى وقت قصير نسبيا وهتزود ثقتك فى نفسك

بشكل ملحوظ.

7) اهتم بالـ Pronunciation

محتاجين نركز اوى فى الكلام اللى جاى عشان ده أحد أهم الاسباب اللى بالرغم انك بقالك كتير بتتعلم وتاخد كورسات انجليزى بس لسه مستواك فى الكلام مش كويس،

طب ليه؟

عشان الانجليزى لغة مش صوتية، يعنى ايه الكلام ده؟ يعنى مفيش علاقة ثابتة ومباشرة بين الكتابة والكلام، مش زى اللغة العربية، اللى هى لغة صوتية، يعنى كل حاجة

بنكتبها فى العربى بنقراها بنفس الطريقة و مفيش استثناءات فى طريقة النطق، اول حاجة اتعلمناها عشان نعرف نقرا واحنا اطفال كانت الحروف الابجدية، وبعدها

اتعلمنا التشكيل، وبعدها ابتدينا نركب الحروف بتشكيلها جمب بعض وابتدينا نقرا، زى < زَ رَ عَ> او< لَ عَ بَ>، والعلاقة ما بين الحروف المكتوبة فى العربي ونطقها

ثابتة ومباشرة

بس الانجليزى عكس كدا تماما، يعنى مش معنى انك بتعرف تقرا انجليزى انك هتعرف تنطق وتتكلم كويس، عشان الكلام ليه قواعد مختلفة عن الكتابة، وده بيفسر

ظاهرة ان الطالب المصرى ممكن يكون ناجح جدا فى دراسته اللى هى بالانجليزى، يعنى بيقرا ويكتب ويفهم انجليزى كويس جدا بس المشكلة كلها بتظهر لما بييجى

يتكلم، ده اللى فضلنا 14 سنة بنتعلمه فى المدرسة قبل ما ندخل الكلية، خلال السنين دى اتعلمنا حاجتين اساسيين كلمات وقواعد Grammar، وفضلنا سنين بنحاول

نطبقهم عن طريق القراءة والكتابة، عشان كدا انت بتعرف تقرا و تكتب كويس جدا، او على الاقل بشكل احسن بكتير نسبيا من الكلام، فتلاقى نفسك اول ما تقدم على

وظيفة اول مطب بيقابلك هو ان الانترفيو نفسه بيكون بالانجليزى والمفروض انك تتكلم،

طبعا انت عشان تحل المشكلة دى بتروح جرى تاخد كورس انجليزى، هتدرس ايه فى الكورس ده، هتدرس كلمات وجرامر تانى، بعد 14 سنة من دراسة كلمات

وجرامر، طب المُدرس بيعلمك تتكلم ازاى؟ اغلب المُدرسين اللى فضلوا يذاكروا سنين عشان ينطقوا ويتكلموا كويس بيلجئوا لحيلة واحدة بس وهى انه يقولك اسمع

وكرر ورايا، من غير ما يشرحلك ليه المفروض تقرا بالشكل ده، يعنى ايه هى القاعدة او حتى يقولك المفروض تحرك بؤك ازاى عشان تنطق صح، يعنى لو هناخد اللغة

العربية كمثال، كأنه بيقولك دى <زَرَعَ>، احفظها كدا، ودى <لَعَبَ>، احفظها كدا، من غير ما يفهك الأبجدية والتشكيل

وده بيسبب مشكلتين، اول مشكلة هى انك دايما بتنسى نطق كل كلمة وبتاخد وقت كبير على ما بتحفظه، وده بيقى صعب عليك وبيخليك متردد لما بتيجى تتكلم

وبالتالى بيأثر على ثقتك فى نفسك لما بتيجى تتكلم قدام الناس

وتانى مشكلة هى ان نطقك وطريقة كلامك مش بتبقى دقيقة بالشكل الكافى، و لو بتتكلم مع حد مستواه كويس جدا او native هتحس انه مش فاهمك

وبيطلب منك انك تعيد اللى قولته تانى، وده بيبقى مُحرج جدا ليك، ومش هتبقى عارف المفروض تعمل ايه

عشان كدا انت محتاج تتعلم وتتمكن من الحاجات دى:

8) الـ 44 صوت فى الـ American English

وبيتقسموا لحاجتين vowels و consonants، احنا دايما لما بنيجى نقرا انجليزى بنستخدم الحروف بس اللى هما 26 حرف، بس احنا عندنا 44 صوت، يعنى تقريبا

نص اللغة مش عندنا، فى 5 حروف متحركة بس بيطلع منهم 16 صوت، وده بيخلينا مهما نحاول نتكلم كويس بنلاقى فى صعوبة واختلاف كبير ما بين وما بين الـ

Native speaker، وده ساعات كمان بيخلينا منفهمهش وهما بيتكلموا، يبقى لازم تحاول تفهم وتتممكن من الـ 44 صوت، عشان كدا قبل ما تتعلم اى كلمة لازم

تعرف الأصوات اللى بتتكون منها الكلمة

9) قواعد النطق

ودى زى الـ ed-endinges والـ S-endings زى مثلا worked و things، نطق الـ S والـ ed هنا ليه قواعد محددة، محتاجين نفهمهم ونطبقهم

10) الـ Syllable tress و الـ Word stress

الـ Concept ده يُعتبر أهم من الأصوات نفسها، لأن أكبر عامل فى فهم الانجليزى هو الـ Stress

English is a stress timed language

يعنى لو انت غلطت فى بعض الاصوات غالبا هتتفهم، بس لو غلطت فى الـ Stress هيبقى صعب جدا تتفهم، الناس اللى مستواها كويس جدا فى الانجليزى بياخدوا

سنين حرفيا عشان يوصلوا للمستوى ده، من كتر احتكاكهم باللغة بيكتسبوا الـ Stress patterns والـ Rythem بتاع اللغة من غير ما يعرفوا ده، عشان كدا انا مُتأكد

ان اى حد شرحلك اى كلمة بالانجليزى قبل كدا قالك كرر ورايا من غير ما يقولك اى حاجة عن الـ Syllable stress او لو انت فى conversation course بتبقى

انت شايف ان طريقة كلامك مختلفة تماما عن المُدرس بتاعك وهو مش بيقولك تعمل ايه، بيصححلك بس الغلطات الاساسية زى الـ P و الـ B والـ TH،

احنا عملنا سلسلة فيديوهات كاملة عن الـ Syllable stress والـ Word stress عشان تبقى بداية كويسة ليك تقدر تشوفها من هنا، يبقى انت مش لازم تاخد سنين عشان توصل

للمستوى ده، لو فهمت القواعد دى وطبقتها بشكل صح، هتوصل لمستوى كويس جدا فى فترة أقصر بكتير

11) الـ Linking

فى 6 قواعد اساسية للـ Linking وده بيسمحلك انك توصل كلامك كله ببعضه وتتمكن أكتر من اللغة و كمان بيخليك تفهم الـ Native speakers وهما بيتكلموا

عشان بتكون فهمت طريقة كلامهم وكل ما تتمكن من الـ Linking اكتر هتبقى Advanced أكتر وكمان الـ Listening skills بتاعتك هتتحسن

12) الـ Intonation

وده ببساطة بيتحكم فى نبرة صوتك فى نهاية كل جُملة، ده اللى بيبين اذا كنت بتقول جُملة ولا بتسأل، وده طبعا شىء مُهم وأساسى للـ communication

13) الـ Reducations والـ Contractions

الـ Reductions هى بدل ما تقول مثلا Tell her تقول teller وبدل ما تقول Did he تقول didee

اما الـ Contractions زى مثلا بدل ما تقول I will تقول I’ll وبدل We are تقول We’re وهكذا، والحاجات دى بنستخدمها فى الـ Formal speech بشكل

اساسى وملهاش علاقة بالـ Casual speech زى ما بعض الناس فاهمة و مستواك فى الكلام عمره ما هيتصنف Advanced لو انت مش بتستخدمهم

كل حاجة من الحاجات دى هتلاقى شرح كتير ليها اونلاين، بس لو عايز تختصر الطريق وتتعلم وتتمكن منهم كلهم فى وقت قصير وتتحط على الطريق، قدم على الـ

pronunciation workshop بتاعتنا من هنا 

فى النهاية

خد بالك ان كل الحاجات اللى اتكلمنا فيها فكرتها الأساسية انها تبقى جزء من يومنا، جزء من الروتين اليومى، يعنى ده هيبقى الـ Lifestyle بتاعك، فانت مش هتهزهق

وتحس انك علطول قاعد بتذاكر، وده هيضمن انك تستمر لحد ما الموضوع يبقى Habit عندك، وهو ده اللى احنا عايزين نوصله.

7 thoughts on “ازاى تبقى Fluent”

  1. The most beneficial and fruitful advice I have ever heard. Thanks a ton for your priceless effort in organizing all these steps. I really miss the workshop that I attended with you, Mr Abdullah Tarek.

Leave a Comment