fbpx

Everything you need to know about CELTA

أى حد في مجاله بيحتاج يطور من نفسه عشان يقدر يكبر ويوصل لمكانة أعلى، و بعد المشاكل الإقتصادية اللى بنمر بيها بقى تطوير الذات شئ حتمى ولابد منه عشان تقدرى تشتغلى فى  مؤسسة كويسة بعائد مادى مناسب. على الصعيد الآخر، المُدرِّسة أو المُعلِمة اتفرض عليها إنها دايما تطور من نفسها لإنها المسئولة الأولى عن بناء أي مجتمع و تحديد مساره و زى ما قال كامل درويش:

“ما أشرقت في الكون أي حضارة إلّا وكانت من ضياء معلم.”

ولو إنتى مُدرِسة إنجليزى فأنتى أكيد سمعتى عن شهادة CELTA اللى مؤسسات كتير حاليا بتشترط الحصول عليها من ضمن شروط التوظيف و ممكن تكونى بتفكرى تاخديها، عشان كده في المقال ده هنقولك كل اللى محتاجة تعرفيه عنها و إزاى هتساعدك في شغلك و مستقبلك المهنى.

إيه هى الـ CELTA؟ 

هى إختصار لـ Certificate in English Language Teaching for Adults و هى شهادة معتمدة من Cambridge Assessment English التابع لجامعة Cambridge واللى بتطور مهاراتك لتدريس الإنجليزى و اللى بتوفرلك المعلومات والخبرة والتدريب العملي للتدريس.

والمميز في الشهادة ديه إنك مش شرط عشان تاخديها تبقى خريجة كلية تدريس انجليزى (زى كلية تربية، آداب أو ألسن…) و كمان معترف بيها فى  معظم دول العالم. يعني تقدرى تشتغلى بيها في دول الخليج أو دول آسيا أو حتى عالإنترنت بسهولة.

ليه لازم تاخدى CELTA؟

عشان أربع أسباب:

  1. طبقا لتقرير تابع لـ Cambridge  Assessment إن فيه 71.5% من الـ  Employers في الشرق الأوسط و أفريقيا و أوروبا بيطلبوا شهادة CELTA من شروط التوظيف. عشان كده هيبقى أسهل عليكى تشتغلى في المكان اللى بتفضليه من غير عوائق.
  2. لو بتعملى  Career shift للـ English Teaching و مش معاكى اى شهادات يبقى CELTA هي طريقك الأول و المختصر.
  3. هتديكى ميزة تنافسية لما تقدمى على وظيفة مع شخص تانى مش معاه الشهادة.
  4. لو مش عندك أى خبرة عملية للتدريس و عايزة تتعلمى إزاى تديرى الفصل وتحَضّرى دروسك و تتعاملى مع الطلبة الكسولين والمحبَطين.

إيه هى شروط وخطوات التقديم؟

  • سنك لا يقل عن 20 سنة 
  • مستواكى في الإنجليزى لا يقل عن (C1) و ده حسب معايير الإطار الأوروبى المرجعي العام للغات (CEFR)
    لو لسه مش عارفة مستواكى تقدرى تعملى الـ Test ده: Free Online Test
  • بعد ما تتأكدى من الشروط ديه هتملى Application من مركز معتمد زى المركز الثقافى البريطانى (British Council) أو جامعة المستقبل (FUE) أو جامعة فاروس في الإسكندرية (Pharos University)
  • بعد كده بتعملى الـ pre task و ده بيتقسم لأربع اجزاء و بيختبرك بشكل عام كمُدرِسة فى تصحيح الأخطاء و تبسيط المعلومات للطلبة و طرق التدريس اللى إنتى بتتبعيها. و على أساس نتيجة الـ pre task هيتم التواصل معاكى عشان تعملى Interview.
  • في الـ Interview بيناقش معاكى إجابات الـ pre task بالتفصيل أكتر.
  • بعد ما بتعدى من الـ Interview بتقدرى تقدمى و تختارى المواعيد المناسبة ليكى
  • لو لقدر الله معدتيش في الـ Test أو الـ Interview  تقدرى تقدمى تانى بعد 6 شهور. 
  • تكلفة الـ Course هى 28,000 جنيه و بيتم دفع جزء في الأول تأكيدا للحجز والباقى قبل ما بتبدأ بوقت محدد و ده بيختلف من مؤسسة للتانية.

الدراسة و الحصول على الشهادة

أولا هتحددى النظام المناسب معاكى و مع مواعيد شغلك، 

إذا كان Full time (وده بيتطلب الحضور يوميا من الأحد للخميس من الساعة 9:30 للساعة 6:00  لمدة أربع أسابيع)

أو تختارى الـ Part time (وده بيتطلب الحضور يومين في الإسبوع و في معظم الأحيان بيبقوا الجمعة والسبت لمدة 10 أسابيع)

* خدى بالك لو هتختارى نظام الـ Full time فأنتى مش هتقدرى تشتغلى أو تعملى أى حاجة تانية بجانب الدراسة لإنك هتحتاجى تذاكرى و تحَضّرى و تحلى Assignments بعد ما تروّحى أو في ايام الـ weekends، كمان مش هتقدرى تغيبى أو تأجلى  أى session عشان الحضور يوميا إجبارى و جزء من حصولك على الشهادة.

 

الدراسة مش عبارة عن مجرد محاضرات إنتى بس بتسمعيها ولكن بتقدرى تطبقى كل حاجة بشكل عملى من خلال تدريس فعلى لمدة 6 ساعات عالأقل متوزعين على مدار الـ Course. كمان هتشوفى مدرسين عندهم خبرة و تتعلمى منهم الطرق اللى بيتبعوها للتدريس.

محتوى الـ Course عبارة عن خمس حاجات و هيغطى كل حاجة من أول الطرق الحديثة و الفعالة للتدريس لحد إدارة الفصل. وتقدرى تعرفى المحتوى بالتفصيل من هنا: CELTA Content in details 

بعد ما تخلصى الـ Course هيتم تقييمك بناء على حاجتين:

1. Teaching practice

زى ما قولنا فوق إنك هتدّرسى لفصول حقيقية لمدة 6 ساعات على مدار الـ  Course و هيتم تقييمك بناءً على أدائك بشكل عام.

2. Written assignments

هيكون مطلوب منك تقدمى Portfolio عن كل حاجة درستيها و الـ Materials اللى جهزتيها للـ Teaching Practice و  أربعة assignments كل واحد ما بين 750 لـ 1000 كلمة. More details

الشهادة متاحة معاكى مدى الحياة و ليها  تقدير عام من تلاتة:

  1. Pass
  2. Pass B
  3. Pass A (و ده أعلى تقدير).

و عموما التقدير مش بيفرق لما بتقدمى على شغل لإن معظم المؤسسات بتطلب الشهادة من غير ما تشترط التقدير.

و لو منجحتيش بتقدرى تقدمى تانى في أى وقت.

بس خلى بالك ان انتى بتحتاجى مهارات تانية بجانب الشهادة، يعنى مثلا لما بتروحى اى interview أو Demo أول حاجة بتلفت النظر هى طريقة نطقك، عشان كدا لو شايفة انك محتاجة تشتغلى على نطقك،  فاحنا عملنالك Free online course عشان يساعدك فى كل أساسيات النطق اللى لازم تكونى عارفاها، تقدرى تقدمى من هنا وهيجيلك على الميل بتاعك: 

http://bit.ly/Pronunciation-Course-for-Teachers

Leave a Comment