fbpx

ازاى تحدد مستواك فى الانجليزى وتختار الشهادة اللى تناسبك

كتير مننا بيقول ” عايز أحسن الإنجليزى بتاعى” أو “عايز آخد كورس إنجليزى” و لما تسأله ليه؟ بيقول ” عشان عايز أشتغل في مكان أحسن” أو ” عشان أبقى جاهز لو سافرت أو شتغلت في كذا” … إلخ
مفيش إختلاف إن الإنجليزي حاجه أساسيه عشان تشتغل فى  مؤسسة كويسه بدخل مقبول بس السؤال هنا…
هل الإنجليزى يستحق الدوامة و الوقت الطويل ده؟ مش يمكن أصلا إنت مش محتاج تاخد أى كورسات و كل اللى محتاجه شويه selfstudy؟
عشان تجاوب على السؤال ده لازم  تعرف إنت فين على خريطة الانجليزى و إيه اللى محتاجه بالظبط عشان تحقق هدفك، ومن هنا ييجى السؤال… 

إزاى أحدد مستوايا فى الإنجليزى؟

كتير  بتسمع ناس بتقول أنا مستوايا في الانجليزي B1  أو مستوايا فى الألماني A2 

يا تري الكلام ده معناه أيه؟ 

في معيار اسمه الـ  CEFR

The Common European Framework of Reference for Languages

ايه؟ 🤔

ده المعيار الأوروبي الموحد لتحديد مستوى اللغة عندك واللى تم تصميمه لتوفير أساس قوى و واضح لتصميم وتطوير مناهج اللغة وتقييم كفاءة اللغة الأجنبية.

والمعيار ده تم وضعه من المجلس الأوروبي في التسعينيات وده حصل لتوحيد وتقوية جهود معلمين اللغات في مختلف الدول، لأن المعيار بيساعد الطالب والمدرس في تقييم المستوى وتقسيم الطلبة وفقا لمعرفتهم واحتياجاتهم وده كان شئ مهم جدا علشان أي حد عايز يتعلم لغة يقدر يعرف يبدأ منين وازاى!

ومستوى أي لغة في العالم وفقا للمعيار الأوروبي بيتقسم كالآتى:

Proficient user Independent user  Basic user
C2 C1 B2 B1 A2 A1

يعني كده عندنا 3 مراحل، كل مرحلة فيها مستويين، بمجموع 6 مستويات :

المستويات ديه بتعبر عن مستوى الطالب في إتقان أي لغة من خلال معرفة مستواه في القراءة والكتابة والتحدث والاستماع يعني من خلال قياس مستوى المهارات الأربعة.

 مرحلة A وده بيكون Basic user 

1- أول مستوى A1 – Beginner 

في المستوى ده الطالب بيكون عنده القدرات دى:

1 – يقدر يفهم ويستخدم  التعبيرات الأساسية اللي بتساعده يعبر عن احتياجاته الأساسية.

2 – يقدر يقدم نفسه للآخرين وكمان بيقدر يسألهم عن المعلومات الشخصية زى مثلا : اسمهم ووظيفتهم ومكان سكنهم وكده.

3 – بيقدر كمان يتفاعل مع اللي بيكلمه ببساطة لو اللي بيتكلم معاه بيتكلم بوضوح وببطء.

تانى مستوى A2 – Elementary 

في المستوي ده الطالب:

1 – بيقدر يفهم التعبيرات المستخدمة بشكل متكرر وبشكل يومى زى العيلة، الشغل أو الـ shopping.

2 – بيقدر يتكلم في الموضوعات الروتينية البسيطة.

3 – بيقدر يوصف الأشياء والاحتياجات الضرورية بطريقة بسيطة.

مرحلة B وهنا الطالب بيكون independent user 

3- تالت مستوى B1 – intermediate 

فى  المستوى ده الطالب أو المتدرب بيكون عنده القدرات دى:

1 –  يقدر يفهم النقاط المتعلقة بالعيلة أو المدرسة او أوقات الترفيه.

2 – يقدر يتعامل مع  مواقف السفر.

3 – يقدر يقدم كلام او نص بسيط حول الموضوعات اللي هو مهتم بيها.

4 – يقدر يوصف تجاربه وأحلامه وخططه بطريقة بسيطة. 

4- رابع مستوى B2 – upper intermediate 

فى المستوى ده الطالب بيكون عنده القدرات دى:

1 – يقدر يتفاعل ويتكلم بشكل طبيعى و عفوي بدون الضغط عليه فى أغلب المواقف.

2 – يقدر يكتب بشكل مُفصل عن موضوعات كتير ويقدر يعبر عن وجهة نظره فى المواضيع دى بالتفصيل.

مرحلة C وهنا الطالب بيكون proficient user 

5- خامس مستوى C1 – advanced 

فى المستوى ده الطالب بيكون عنده القدرات دى:

1 – يقدر يفهم مجموعة كبيرة من النصوص المتطورة والمحادثات الطويلة من غير ما يحتاج يبحث كتير.

2-  يقدر يستخدم اللغة دايما بشكل فعال فى الشغل، الدراسة أو كل المواقف اليومية.

6- سادس مستوى C2 – Proficiency 

فى  المستوى ده الطالب:

1 – بيقدر يفهم أي حاجة يقرأها أو يسمعها.

2 – بيقدر يعبر عن نفسه في أي سيناريو معقد. 

3- بيقدر يعمل Presentation عن اى موضوع ويلخص أفكار كتير بطريقته.

علشان كده قبل ما تبدأ تذاكر، لازم تبقى عارف انت مستواك ايه  عشان تعرف انت هتبدأ منين وازاى زى ما اتفقنا.

وتقدر تعرف مستواك من هنا  👉

بعد ما عملت ال test  وعرفت مستواك فين بالظبط; هتحدد هدفك

زى ما اتفقنا مفيش حاجة اسمها انا عايز احسن الانجليزى بتاعى، لازم تحط هدف واضح عشان تقدر توصله ولازم تراعى ان هدفك يكون SMART, وده معناه 

Specific –  Measurable –  Attainable – Realistic – and Time based 

فلو انت بتحضر ماجستير، هتسافر تدرس برا، بتقدم على هجرة أو عايز تشتغل فى شركة multinational، لازم تعرف ايه المستوى المطلوب منك عشان تتقبل فى الحاجات دى 

وعشان تعرف توصل لهدفك لازم تعرف ايه الشهادة اللى محتاجها او الامتحان اللى لازم تعديه 👇

أهم الشهادات فى الانجليزى

من أكثر الشهادات المطلوبة الفترة ديه هي شهادة الـ IELTS و الـ  TOEFL

ودايما الناس بتسأل هو ايه الفرق بينهم؟

طيب المفروض يكون مستوايا ايه علشان اخد الاختبار ده؟ 

مستواك المفروض يكون على الأقل B2  وانت مش بتاخد كورس IELTS أو TOEFL ويخلص كده، انت بتاخد preparation  الكورس وبعد كده بتروح تمتحن الامتحان في مكان معتمد.

طيب هو انت بتدرس الكورسات ديه ليه او بتروح تمتحن ليه ؟؟؟

ده بيكون لبعض الأسباب زي انك لو بتحضر ماجستير فأنت بتحتاج اختبار منهم حسب الجامعة اللي بتحضر فيها او لو انت مسافر او مهاجر فانت برده لازم تعمل اختبار منهم حسب طبعا البلد بتشترط ايه.

1- امتحان الـ IELTS

  • ده اختصار لـ International English Language Testing System 
  • هو عبارة عن اختبار لقياس قدرتك على التواصل باللغة الإنجليزية من خلال قياس المهارات الاربعة
    Listening -Speaking – Reading – Writing، و بنستخدم الاختبار ده سواء لأغراض دراسية أو للعمل أو السفر، يعني لو بتحضر ماجيستر في بعض الجامعات أو لو محتاج تأخد منحة في بعض الأماكن أو لو مسافر لغرض الدراسة أو لغرض الهجرة هتحتاج الأختبار ده.
  • في جامعات وبلاد ومؤسسات عالمية كتير بتعترف بالاختبار وبيكون من شروط القبول فيهم زى مثلا المؤسسات التعليمية في المملكة المتحدة واستراليا ونيوزيلندا وهونغ كونغ وايرلندا وجنوب أفريقيا ، وعدد كبير من الهيئات المهنية في جميع أنحاء العالم
  • الاختبار موجود  في 59 مكان في US وحوالي 900 مكان حول العالم.

الامتحان بيكون عبارة عن 4 أجزاء:

 

1- الـ  speaking : بيكون مع ممتحن face to face وبتكون مدته من 11 لـ 14 دقيقة 

2 – الـ listening  بيكون 30 دقيقة.

3 – الـ  Writing : الكتابة بتكون على ورق بخطك وممكن تحجز الامتحان computerized وتكتب على الكمبيوتر.

وكمان هنا في اختلاف بين academic أو general، الاختلاف بيكون في task 1  بس،

لو انت بتمتحن academic، الـ task بيكون كالتالي: 

Describe and analyse data in one of the following:

  • Bar chart
  • Line graph
  • Pie chart
  • Table
  • Diagram

ولو بتمتحن general

الـ task بيكون formal – semi or informal letter

4 – الـ Reading: هنا بتكون الأسئلة choose – complete or correct

المحتوى هنا بيكون اما academic or general

وده بيكون على حسب سبب الاختبار يعني لو السبب دراسي بتمتحن الأكاديمي ولو سبب الهجرة مثلا بتمتحن جنرال ومدته بتكون 60 دقيقة.

ممكن تمتحن في الـ British Council أو IDP

2 – امتحان الـ TOEFL

Test Of English as a Foreign Language

هو اختبار في اللغة الإنجليزية كلغة ثانية، وهو اختبار تم وضعه من ETS في جامعة برينستون في US

والاختبار ده بيقيس مدى إجادة الطلاب للمهارات الأربعة.

في جامعات وبلاد ومؤسسات عالمية كتير بتعترف بالاختبار وبيكون من شروط القبول فيهم، و معترف بيه في أكتر من 3000 جامعة في 130 دولة حول العالم.

 الاختبار موجود فى 500 مكان فى US وحوالي 4500 مكان حول العالم.

الامتحان بيكون عبارة عن 4 أجزاء:
1 – Listening

 بيكون مدته ساعة.

Writing -2

الكتابة بتكون علي الكمبيوتر.

reading – 3

نوع الأسئلة بيكون اختيار من متعدد بس وبيكون محتوى أكاديمي فقط.

Speaking -4

أنت بتتكلم مع الكمبيوتر و بتسجل حاجة وبعدين بيتم تصحيحها وبيكون مدته 20 دقيقة.

نيجى بقى للسؤال ده:
أمتحن أنهى إمتحان؟

في جامعات ومؤسسات بتعتمد الشهادتين أو شهادة واحدة بس فلذلك قبل ما تأخد حاجة منهم بتسأل المكان أو الجهة اللي أنت عايز تقدم فيها وكل مكان أو جامعة بيطلب درجة معينة من ال TOFEL  أو band معين من ال IELTS

واختيارك انت لأي من الاختبارين لو المكان أو الجهة بتقبل الاتنين بيكون بناءا علي انت بتفضل ايه في مدة الاستماع وكتابة الملاحظات وكمان حسب انت بتفضل تحل اسئلة اختيارات بس ولا أنواع ثانية من الأسئلة… 

وطبعا في اختبارات تانية كتير علشان تقيس مستوى اللغة عندك، وانت بتختار منها على حسب احتياجك للاختبار حسب المكان أو الشغل اللي بتقدم عليها.

3 – اختبار Linguskill

هو اختبار سريع أون لاين علشان يساعد الأفراد والمؤسسات في تحديد مستوى المتقدمين ليهم، يعني ممكن تمتحنه علشان تعرف مستواك أو تمتحنه في مكان انت مقدم فيه كتحديد مستوى.

الاختبار بيقيس المهارات الأربعة للغة Listening – speaking – reading – writing.

وكمان بيوفرلك نتائج دقيقة في 48 ساعة.

والتقييم بتاعه بيكون بناء على معيار الـ CEFR.

الاختبار بيكون 4 انواع

1- For education

2 – For employers

3 – For business

4 – Become a linguaskill agent

وطبعا انت بتمتحن اللي انت محتاجه بس.

4- اختبار SEPT 

Standardized English Proficiency Test

الاختبار ده مصمم لقياس مستوى اللغة للناس اللي الانجليزى عندهم لغة تانية وبيحدد مستوى الممتحنين طبقا لمعيار الـ CEFR اللي اتكلمنا عنه قبل كده.

الاختبار ده بيغطي 3 skills

Listening – reading and writing

طبعا لسه مخلصناش

لسه في امتحانات تاني ممكن تقيس مستواك، او ممكن تحتاج تمر بيها علشان مكان معين او شغل معين.

5- اختبار PET

Preliminary English Test

بيكون الاختبار ده تابع Cambridge university

بتقدر تدخل الامتحان ده لو عايز تعرف انك في المستوى المتوسط للغة ، وانت في المستوي ده هتقدر تستمتع برحلتك في أي بلد ناطقة للغة وتقدر تستكمل دراستك بالانجليزى.

والاختبار ده بيقيس مستوى المهارات الأربعة عندك.

وبيكون متاح في بعض مراكز تعليم اللغة.

6- اختبار FCE

First Certificate in English

الاختبار ده بيكون للمستوي المتوسط برده بس أقوي وأصعب من ال PET  يعني بيثبت أنك upper intermediate 

والاختبار ده بيقيس مستوى المهارات الأربعة عندك.

وبيكون تابع لـ Cambridge university

7- اختبار CAE

Certificate in Advanced English

الطلبة اللي في مستوي متقدم يقدروا يدخلوا الامتحان ده ، لأنه بيحتاج ان الـ Speaking والـ writing يكونوا مستواهم كويس جدا عندهم علشان يجتازوا الامتحان ده.

وبيكون طبعا تابع لـ Cambridge university

8- اختبار CPE

Certificate of proficiency in English

وده بيكون أصعب اختبار من cambridge، الاختبار ده بيقيس مستوى اللغة عندك بس بالتفصيل وبطريقة أعمق.

ولأن رحلة تعلم اللغات رحلة طويلة وشيقة فبرده احنا لسه مخلصناش😎

لسه في اختبارات تاني وانواع تانية بتعتمد عليك هتحتاجها ولا لا، وطبعا ده مش معناه انك هتمتحن كل حاجة ….. لا طبعا كل واحد بيختار هو بيمتحن ليه ولأي جهة أو أي وظيفة ، سبب احتياجك للاختبار هيحددلك انت هتمتحن ايه بالظبط، خلينا نشوف اختبارات تانية ممكن تحتاجها:

9- اختبار TOEIC

Test of English For International Communication

وده اختبار اللغة الإنجليزية للتواصل الدولي، وبيستخدم عادة للعمل والشركات وخاصة في في آسيا.

ونتيجته بتكون صالحة لمدة سنتين ، غالبا الاختبار ده بيطلب منك لو هتشتغل فى شركة عالمية.

10- اختبار OPI و OPIC 

Oral proficiency Interview

و

Oral proficiency Interview computer

الاختبار ده بيستخدم علشان يقيس قوة التحدث عندك يعني ممكن تدخل الاختبار لو مطلوب منك في شغل معين أو لو أنت مدرس وعايز تقيس الـ  speaking عندك وبيكون اما مع ممتحن face to face اوعلي الكمبيوتر. وطبعا انت بتدخل الاختبار ده لو مش محتاج تقيس أي مهارة تانية، الاختبار من خلال الكمبيوتر تقدر تعمله من البيت وبيكون ارخص طبعا.

رايحين فين بس، احنا لسه مخلصناش 😂 

لسه في كمان اختبارات خاصة بالـ business بس:

11 – اختبار B1 business preliminary

وده بيكون من Cambridge و بيقدملك المستوى المطلوب في المهارات الأربعة علشان تقدر تبدأ أعمالك التجارية بالانجليزى يعني بيكون عندك الـ basics اللي تساعدك كويس.

 12- اختبار B2 business vantage

هنا مستواك بيكون أعلى، بمعني ان الاختبار ده بيثبت انك تقدر تقوم بأعمالك وشغلك على المستوى الدولى من خلال قدرات اللغة عندك.

والاختبار ده ممكن يساعدك علشان تشتغل في أماكن أفضل أو تحصل على ترقية طبعا.

14- اختبار C1 business higher 

الاختبار ده بيبين انك وصلت لمستوى C1 فى الـ Business English، و ده بيثبت ان مهاراتك اللغوية تؤهلك للعمل بمستوى عالى وفعال دوليا.

اختبارات خاصة بطلاب المدارس

طبعا Cambridge University عملت اختبارات خاصة بطلاب المدارس لأن تم تصميم المؤهلات ديه علشان توفر أساس قوى للتعلم ومساعدة الأطفال والمراهقين على اكتساب الثقة وتحسين مهاراتهم في اللغة الإنجليزية.

14 – اختبار Pre A1 Starters

ده بيكون أول اختبار للأطفال من جامعة Cambridge.

الاختبارات دى بتقدم الأطفال للغة الإنجليزية المنطوقة والمكتوبة يوميًا وديه طريقة ممتازة ليهم لاكتساب الثقة وتحسين لغتهم.

الاختبارات بتكون مكتوبة حوالين موضوعات مألوفة والتركيز بيكون على المهارات الأساسية للتواصل بشكل فعال باللغة الإنجليزية من خلال الاستماع والتحدث والقراءة والكتابة.

16 – اختبار A1 Movers

ده تاني اختبار للأطفال من جامعة Cambridge و بيكون اقوي شوية من الاختبار الأول ونتيجته بتبين ان الطالب فى مستوى A1 

17- اختبار A2 Flyers

ده ثالث اختبار للأطفال من جامعة Cambridge ونتيجته بتبين ان الطالب فى مستوى A2 

18- اختبار A2 Key for Schools

 بيساعد الطالب فى استخدام اللغة الإنجليزية للتواصل في مواقف بسيطة.

وديه طبعا  الخطوة المنطقية بعد  الاختبارات اللي فاتت وده اختبار ملائم جدا للأطفال اللى سنهم أكبر شوية عشان يبدأوا يتعلموا اللغة الانجليزية.

19- اختبار B1 Preliminary for Schools

ده  بيقيس مستوى الطالب لإثبات قدرته على استخدام اللغة الانجليزية في التعامل اليومي في المجالات الأساسية للحياة، بمعنى انه تقريبا بيساوي المستوى B1  بس مع اختلاف المحتوى المخصص لطلاب المدارس.

20- اختبار B2 First for Schools

والاختبار ده برضه أحد مؤهلات Cambridge  اللي بيدي الطالب الثقة في استخدام اللغة للتعامل مع العالم الحقيقي.

والاختبار ده بيثبت ان الطالب عنده القدرة على التعامل واستخدام اللغة في بيئة ناطقة باللغة الانجليزية.

وبيشبه المستوى B2  مع اختلاف محتواه المقدم لطلاب المدارس.

دلوقتي تقدر تختار الامتحان او الـ course اللي انت محتاجه، لو عندك اى سؤال اكتبه فى comment واحنا هنرد عليك 🙂 

1 thought on “ازاى تحدد مستواك فى الانجليزى وتختار الشهادة اللى تناسبك”

  1. هو انا ممكن اتعلم سيلف ستدي من البيت لغه معينه واتقنها كويس وبعد ما تعلمها اروح لمكان معتمد مثلا جامعه بريطانيه او اوUSA وبعد كده اعمل اختبار تحديد مستوي وبعد كده اخد الشهادة

Leave a Comment